「中小企融資擔保計劃」李老總。黄老闆。何經理 ~ 真誠對話

何經理：

黄老闆，乜咁啱撞到你，返中山過周末，打Golf？

黄老闆：

係呀！舊年成年個市都立立亂，要睇實啲生意，係到依家先至話得閒啲，可以歇一歇。

何經理：

舊年啲生意點樣，有冇融資方面嘅嘢我哋銀行可以幫到手？

黄老闆：

多謝晒先，不過暫時唔使住，你哋銀行畀我條line仍然夠用。舊年外圍經濟環境波動得緊要，初時爆出英國脫歐，之後走隻黑天鵝特朗普出嚟，匯市更係風高浪急。我哋做轉口生意真係要打醒十二分精神，唔好話擴張，可以守好檔生意，已經算係唔錯㗎嘞。講開又講，乜唔係話銀行對中小企閂水喉咩？

何經理：

我哋銀行對中小企放款無話特別手緊咗喎！同啲行家講起亦唔覺呢個係普遍嘅情況。但正如你所講，外圍經濟環境波動，我哋都會格外留神，多啲關注一下客戶嘅風險。

黄老闆：

有乜貼士可以幫中小企攞到line？盤數唔靚或者新公司會唔會好難借到？

何經理：

其實最緊要都係做好基本功，提供齊全嘅財務同埋業務資料對申請最有幫助。我哋同客戶係長期嘅關係，唔會因客戶嘅財務狀況一時受經濟周期影響而落雨收遮。另外，可以考慮政府提供嘅融資協助計劃，有冇聽講過中小企融資擔保計劃，即係SFGS？

黄老闆：

有呀! 上次按揭證券公司派代表上我哋商會介紹過，仲收過佢哋經商會發放嘅消息。聽落好似好筍，唔使抵押品、最多借千二萬、計埋保費每年利息都係五厘幾。但係我聽啲中小企老闆講有啲銀行好似唔係好積極推介。無理由，政府擔保咗八成風險！

何經理：

我都聽聞過有啲行家擔心無得賠，咪唔鼓勵啲客申請囉。不過前排按揭證券公司走訪咗各大銀行，解釋咗佢哋嘅理賠原則同程序。我問過我銀行催收部門嘅同事，佢哋了解多咗後更容易配合按揭證券公司嘅理賠工作，索償嘅過程都順暢咗。我留意到有行家明顯積極咗接觸中小企客戶同推介計劃。

黄老闆：

會唔會好難申請，門檻會唔會好高？

何經理：

唔會，營運超過一年同還款記錄良好就合資格。申請要嘅都係一般公司註冊同股東資料。我哋幫客遞咗form後幾日就有回覆。

(呢個時間何經理留意到李老總原來坐在後排)

何經理：

李總，啱晒嘞，你喺度，我同呢位黄老闆正講起貴寶號嘅SFGS。不如由你直接介紹一下最新情況。黄老闆，呢位係按揭證券公司嘅CEO，李總。

李老總：

何經理，首先多謝你幫我公司推介SFGS畀黄老闆。其實你好多行家最近都落力咗推SFGS。以往第三、四季一般都比較淡靜，但我哋睇到SFGS嘅申請數字自舊年第三季起有回升跡象。個別比較積極嘅銀行更有明顯嘅升幅。我哋希望個增長勢頭今年可以保持。當然，大家都了解申請數字嘅變化好受到個經濟大環境所影響。

黄老闆：

李總，你哋咁落力推SFGS，一定賺唔少？

李老總：

啱啱相反，啲保費我公司一毫子都冇落袋。其實個計劃收到嘅保費全部屬於政府，用嚟賠償壞賬畀銀行，我哋只係協助政府營運個計劃，主要係想幫到多啲中小企。

黄老闆：

按揭證券公司仲有乜板斧再幫下我哋啲中小企先？ 保費可唔可以再減啲？ 保額可唔可以再加啲 ？

李老總：

由於政府先至係金主，保費同保額我哋就話唔到事嘞。但計我話依家個保費已經好平，只係正常嘅兩、三折。以一百萬貸款額同六厘息嚟計，一個月保費先至幾舊水，飲餐茶嘅價錢。喺我公司嚟講，最緊要係確保計劃運作暢順，畀到大家信心個計劃有得賠同賠得快，銀行先至會更安心同更積極去利用個計劃支持中小企。正如何經理頭先講，呢幾個月我哋見咗唔少銀行，解釋咗我哋嘅理賠程序同原則，消除咗唔少誤解。由於銀行之後能夠更加積極配合我哋嘅理賠工作，過往幾個月完成嘅賠償case亦大幅增加。另外，我哋亦會因應收集到嘅意見進一步優化理賠嘅程序。

何經理：

李總，我哋銀行一定會繼續積極配合同支持呢個計劃。

李老總：

個計劃仲有大把水位，可以借多差唔多八百億元，我哋好希望大家可以踴躍使用！

黄老闆：

睇嚟個計劃真係幫到手喎！等我見到其他中小企老闆時大力推一推，畀多幾個Like！

李老總：

多謝多謝！

中小企融資擔保計劃主要發展及参考數據：

• 按揭證券公司去年積極向業界及銀行推介中小企融資擔保計劃，包括與業界代表及銀行管理層會面，及向銀行員工講解計劃運作
• 根據過往經驗，計劃的申請數字通常自年中會開始有所回落，但2016年第三及第四季的申請數字非但沒有下跌反而有所上升，個別加強了中小企業務的銀行更錄得顯著增長
• 在銀行積極配合下，按揭證券公司2016年全年完成的索償個案達94宗，比2015年的62宗增加了52%，其中73宗於2016年第三及第四季完成
• 按揭證券公司早前進一步優化計劃處理索償的程序，包括減省索償須提交的資料及讓銀行預先上載文件以提升索償效率，亦更早讓銀行知悉索償是否獲批

香港按揭證券有限公司
2017年1月23日